Garasaç jan, seni gören kişiniň
Gije-gündiz işi ahy-zar olar.
Höziri bolmaýyn ýazu-gyşynyň,
Hesretiňde ýörüp, ömri har olar.
Meni sen öldürdiň gara göz bile,
Bagrymy eretdiň şirin söz bile,
Husn içinde elli bile, ýüz bile
Bäs eýleseň, hemme şermysar olar.
Sen bezenip, haçan çyksaň daşary,
Turuzar sen halka ruzy-magşary,
Möwlamyň ýaradan peri-beşeri,
Hemme gelip, saňa hyzmatkär olar.
Heýkel-tumaryňy boýnuňa asyp,
Ýol ýörseň, näz bile aýagyň basyp,
Zülpüň çil-çil bolup, her ýandan ösüp,
Iki al ýaňakda müşkibar olar.
Ýüz juwan-kenizdir, elli gyz—nöker,
Her gören-görmedik arzuwyň çeker,
Zenahdanyň—alma, lebleriň—şeker,
Her kim ondan datsa, ygtybar olar...
Her ýüzüň görende, köňül açylar,
Gep ursaň, agzyňdan dürler saçylar,
Inçe bilden, ýa reb, haçan guçular?
Anyň üçin köňül bikarar olar.
Hüýru-gulman gelse ýanyňa seniň,
Sençe bolmaz husny-jemaly anyň,
Ak gujagyň bile ol näzik teniň,
Kişi bilmez, kime sezewar olar.
Aý ýüzi–ýasemen, dahany–gunça,
Äleme ot salyp, köýdürme munça!
Ilde bir näzenin tapylmaz sençe,
Barça älem saňa intizar olar.
Gaşlaryň kemandyr, kirpigiň okdur,
Ýalançyda sen dek näzli gyz ýokdur,
Aşyk Seýdi diýer, bu sözüm hakdyr,
Aşyklara ýalan diýmek ar olar.
Hiç yorum yok:
Yorum Gönder