Aýryldyk

Eý agalar, arman bilen
Dürli döwrandan aýryldyk.
Il bolup Rahym han bilen,
Haýdar soltandan aýryldyk.


Bedew münüp, begres geýen,
Ne näzi-nygmatlar iýen,
Köp eşretli Lebap diýen
Bir gadyrdandan aýryldyk.


Girdik bir çöli-mugana,
Suw içmedik gana-gana,
Uçradyk azaby-käne,
Rahaty-jandan aýryldyk.


Ärsarynyň ady ýitdi,
Her haýsy bir ýana gitdi,
Han «hezretiň» köňli bitdi,
Biz weli sandan aýryldyk.


Subhy-şam bilen ýörüşen,
Haýry-şeri deň görüşen,
Zowky-sapalar sürüşen
Ýary-ýarandan aýryldyk.


Daglarda dikilmiş eren,
Gyrylmyşdyr sansyz jeren,
Ürgenç, Lebaba suw beren
Bahry-ummandan aýryldyk.


Kürsüsi niçe paýaly,
Begler galdy köp daýaly,
Ser howuzly, hoş saýaly
Köşki-eýwandan aýryldyk.


Niçe yşwaly, şiweli
Gaçdyk, tapmady hywaly,
Dürli şejerli, miweli
Bagy-bossandan aýryldyk.


Tapmaýan öňki eşreti,
Ýuwtarmyz gamy, hesreti,
«Isteý-isteý» han «hezreti»,
Ahyr mekandan aýryldyk.


Seýdi diýer, haýp Lebap!
Galdy ilsiz-günsüz garap,
Berhem bolup mülki-esbap,
Bar hanymandan aýryldyk.